જયંત વિશનજી છેડા વિશે

અથાક મહેનત, સમર્પિતતાઅને વ્યવસાયિક શ્રેષ્ઠતાનું અનુસરણ કરવાથી તેમને ખ્યાતિ અને સફળતા મળી. વ્યવસાયિક વૈવિધ્યકરણના દૃષ્ટિકોણથી, તેમણે મીડિયા ક્ષેત્રમાં પ્રવેશ કર્યો અને ૧૯૯૮માં મુલુંડ ટાઈમ્સ પબ્લિકેશન સેન્ટર કંપનીના માલિક અને સંપાદક તરીકે ઉત્તર પૂર્વ મુંબઈ સ્થિત મુલુંડ ઉપનગરમાં "ગુર્જરમાત" નામનું સાપ્તાહિક અખબાર શરૂ કર્યું. આ સાપ્તાહિક અખબાર લોકોની ખૂબ ચાહના પામીને આજે ૨૭ વર્ષથી જનતાના અનુભવો અને અવાજને યોગ્ય વાચા આપી રહ્યું છે.

ગુર્જરમાત માટે તેમણે અનુભવી પત્રકાર ચંદ્રસેન મોમાયાની નિમણૂંક કરી એના કારણે ગુર્જરમાતની લોકપ્રિયતા વધી ગઈ. ગુર્જરમાત અખબારના પાંચ વર્ષ પૂર્ણ ત્યારે તેમણે ગુર્જરમાત દ્વારા મુલુંડ ઉપનગરના વ્યવસાયિકોની દુકાનના નામ, ફોન નંબર, સરનામાં સાથે મુલુંડ માર્ગદર્શિકા (ગાઈડ) પ્રકાશિત કરી. ત્યારબાદ મુલુંડના સમૃદ્ધ ઈતિહાસ અને વિકાસનો પરિચય કરાવતી મુલુંડ ડોક્યુમેન્ટરી ફિલ્મનું નિર્માણ કર્યું. મુલુંડના યુવતી-યુવાઓ માટે મુલુંડ મેરેથોન તથા તેના ફિટનેસ માટે મુલુંડ સ્પોર્ટસ એકેડેમી ચેરિટેબલ ટ્રસ્ટની સ્થાપના કરી, જેના નેજા હેઠળ ૨૦૧૦ થી ૨૦૨૦ સુધીમાં મુલુંડના યુવક-યુવતી મુંબઈ મેરેથોનના હિસ્સા બની ગયા છે.

જયંત છેડા વિવિધ સંસ્થાઓ સાથે જોડાઈને લોકો અને સમાજની સેવા કરી રહ્યા છે.

તેમના સામાજિક કાર્યની યોગ્ય કદર અને સ્વીકૃતિ રૂપે મહારાષ્ટ્ર સરકારે તેમને સ્પેશિયલ એક્ઝિક્યુટિવ ઓફિસર (S.E.O.)ના પદથી નવાજ્યા અને પોલીસ વિભાગે તેમને "પોલીસ મિત્ર" એવોર્ડથી સન્માનિત કર્યા છે.

લાયન્સ ક્લબ : લાયન્સ ક્લબ ઓફ મુલુંડમાં જોડાયા પછી, તેઓ લાયન્સ ક્લબ ઓફ મુલુંડના કાર્યશીલ પ્રેસિડેન્ટ અને ઝોન ચેરમેન બન્યા. ૨૦૦૫-૨૦૦૬માં જયારે જયંત છેડા લાયન્સ ક્લબ ઓફ મુલુંડના પ્રેસિડન્ટ હતા ત્યારે મુલુંડમાં અતિ ભારે વરસાદના કારણે સર્જાયેલી પૂરની સ્થિતિમાં પૂરગ્રસ્ત લોકોને સહાયતા કરી અને મેડિકલ કેમ્પ દ્વારા લોકોની સારવાર કરવામા માટેનું ઉત્તમ આયોજન કર્યું હતું.

સમાજના કલ્યાણ માટેના તેમના કાર્યને વિવિધ પ્રતિષ્ઠિત સંસ્થાઓ અને સત્તાવાળાઓ દ્વારા માન્યતા આપવામાં આવી છે અને તેમને આંતરરાષ્ટ્રીય સ્તરે વિવિધ એવોર્ડ્સ અને પુરસ્કારો એનાયત કર્યા છે.