સમાચાર

બુધ્વાર, ૧૯ નવેમ્બર, ૨૦૨૫

બાલરાજેશ્ર્વર નજીક ફુટપાથ પર અડ્ડો જમાવનારા મેકેનિકો સામે ટ્રાફિક વિભાગની કડક કાર્યવાહી

મુલુંડ-વેસ્ટના લાલ બહાદુર શાસ્ત્રી માર્ગ પર બાલરાજેશ્ર્વર મંદિર નજીક અને સંતોષી માતા મંદિરની સામેની ફુટપાથ પર કબજો કરીને બેસતા મેકેનિકો સામે ટ્રાફિક વિભાગે છેલ્લા 15 દિવસથી કડક કાર્યવાહી હાથ ધરી છે આ કાર્યવાહી દરમ્યાન ટ્રાફિક વિભાગ દ્વારા ફુટપાથ પર પાર્કિંગ કરેલાં 40થી વધારે વાહનોને દંડ કરવામાં આવ્યો હતો. 
બાલરાજેશ્ર્વર મંદિર નજીકની બિલ્ડિંગમાં રહેતા એક રહેવાસીએ જણાવ્યું હતું કેઅહીં મેકેનિકોએ જાણે ફુટપાથને ખરીદી લીધી હોય એવી દાદાગીરી કરતા હતા. એના કારણે વીણાનગર, ગોવર્ધનનગરમાં રહેતા નાગરિકોને ત્રાસ સહન કરવો પડતો હતો. મોટા ભાગના નાગરિકો બાલરાજેશ્ર્વર અને સંતોષી માતા મંદિર જવા માટે ટ્રાફિકથી બચવા એલબીએસમાર્ગ પર ન ચાલીને ફુટપાથનો ઉપયોગ કરવાનું પસંદ કરતા હોય છે પરંતુ મેકેનિકોએ ફુટપાથ પર કબજો જમાવી લીધો હોવાના કારણે રાહદારીઓને ખૂબ મુશ્કેલીનો સામનો કરવો પડતો હતો. થોડા સમયથી ટ્રાફિક પોલીસ ફુટપાથ પર વાહન દેખાતાં એના પર દંડ કરી રહ્યા છે એટલે હાલમાં તો અમારી તકલીફનો ઉકેલ આવ્યો છે.’
મુલુંડ ટ્રાફિક વિભાગના એક સિનિયર અધિકારીએ કહ્યું કે ‘છેલ્લા 10 દિવસથી અમે અહીં કડક કાર્યવાહી હાથ ધરી છે. સવારથી સાંજ સુધીમાં અમારા અધિકારીઓ દસથી 15 વાર અહીં વિઝિટ કરીને ફુટપાથ ઊભાં રાખવામાં આવેલાં વાહનો પર કાર્યવાહી કરી રહ્યા છે. છેલ્લા 10 દિવસમાં 40થી વધારે વાહનો પર નો-પાર્કિંગની કાર્યવાહી કરવામાં આવી છે.’