સમાચાર

બુધ્વાર, ૧૯ નવેમ્બર, ૨૦૨૫

એલ.બી.એસ.રોડ પરના ટ્રાફિકની સમસ્યા ઉકેલવાની ઉપાય યોજના

મુંબઈના પૂર્વ ઉપનગરમાં વર્ષોથી લાલબહાદુર શાસ્ત્રી રોડ પર રહેલી ટ્રાફિકની સમસ્યાનો બહુ જલદી અંત આવવાનો છે. મુંબાઈ મહાનગરપાલિકાએ કુર્લા પશ્ર્ચિમમાં કલ્પના ટોકિઝથી ઘાટકોપર પશ્ર્ચિમમાં પંખે શાહ બાબા દરગાહ સુધીના 4.2 કિલોમીટર લાંબા ફ્લાયઓવરના નિર્માણ માટે ટેન્ડર મગાવ્યા છે. અંદાજે 1,635 કરોડ રૂપિયાના ખર્ચે આ બ્રિજ બાંધવામાં આવવાનો છે. આગામી ત્રણ વર્ષમાં આ બ્રિજનું કામ પૂરું થવાની અપેક્ષા છે. સાયનથી લઈને થાણે સુધીના પટ્ટામાં એલબીએસ રોડ પર ઘાટકોપરમાં ત્રણ મુખ્ય જંકશન પર અંધેરી-ઘાટકોપર લિંક રોડ, ઘાટકોપર સ્ટેશન રોડ અને સંત નરસી મહેતા રોડ પર ભારે ટ્રાફિક રહેતો હોય છે. આ પટ્ટામાં ઘણા નાના ક્રોસ રોડને કારણે ટ્રાફિકની સમસ્યા વકરી રહી છે. તેથી પાલિકા અહીં ટુ-વે, ફોર વે ફ્લાયઓવર બનાવીને ટ્રાફિકની સમસ્યાનો ઉકેલ લાવવા માગે છે. પાલિકાના ઉચ્ચ અધિકારીના જણાવ્યા મુજબ અંધેરી ઘાટકોપર લિંક પર શ્રેયસ જંકશન, સર્વોદય હોસ્પિટલ નજીકનું જંકશન અને સંત નરસી મહેતા રોડ પર બીએમસી યાર્ડની સામેના જંકશન જેવા સ્થળોએ થતા ટ્રાફિકની સમસ્યા માથાનો દુખાવો બની ગયો છે. વધુમાં એલબીએસ પર નાના જંકશન અને ક્રોસ રોડને કારણે ટ્રાફિકની સમસ્યા વધુ વિકટ બની ગઈ છે. તેથી ફલાયઓવરને કારણે આ સમસ્યામાં રાહત મળી રહેશે. અધિકારીએ વધુમાં જણાવ્યું હતું કે એલબીએસ રોડ પ્રમાણમાં થોડો સાંકડો છે. તેમાં પાછું આ ફ્લાયઓવરની ડિઝાઈન પર થોડી જટીલ રહેવાની છે કારણકે એલબીએસ રોડ પર મહારાષ્ટ્ર રેલ ઈન્ફ્રાસ્ટ્રકચર કોર્પોરેશન દ્વારા ઘાટકોપર પૂર્વ અને પશ્ર્ચિમને જોડતા બ્રિજ બનાવવામાં આવી રહ્યો છે. તેમાં પાછું સર્વોદય હોસ્પિટલ નજીક મેટ્રો લાઈન પર છે. તેથી આ ફ્લાયઓવર મેટ્રો લાઈન ઉપરથી બનાવવાનો રહેશે. કુર્લા-ઘાટકોપર વચ્ચેના આ ફ્લાયઓવર માટે બીડ સબમીટ કરવાની અંતિમ તારીખ છ ડિસેમ્બર છે. એ અગાઉ 21 નવેમ્બરના પાલિકાના મુખ્યાલયમાં પ્રી-બિડ મીટિંગ યોજાશે.