સમાચાર

બુધ્વાર, ૨૬ નવેમ્બર, ૨૦૨૫

મુલુંડમાં નકલી આંતરરાષ્ટ્રીય કોલ સેન્ટરનો પર્દાફાશ : મુલુંડ પોલીસ દ્વારા કાર્યવાહી

મુલુંડ પોલીસે તાજેતરમાં એક નકલી આંતરરાષ્ટ્રીય કોલ સેન્ટરનો ભાંડાફોડ કર્યો છે, જે લોન ફ્રોડ ચલાવી રહ્યું હતું. નવેમ્બર મહિનામાં કરવામાં આવેલી આ કાર્યવાહી દરમિયાન પાંચ લોકોને ઝડપી લેવામાં આવ્યા હતા. આ કોલ સેન્ટર ખાસ કરીને અમેરિકા અને કેનેડાના નાગરિકોને નિશાન બનાવી, લેન્ડિંગ પોઈન્ટ નામની અમેરિકન નાણાકીય કંપનીના કર્મચારીઓ તરીકે ઓળખ આપી છેતરપિંડી કરતું હતું.
ધરપકડ કરાયેલા આરોપીઓની ઓળખ સાગર રાજેશ ગુપ્તા (27 વર્ષ, રહે. મુલુંડ), અભિષેક સુર્યપ્રકાશ સિંહ (28 વર્ષ, રહે. મુલુંડ), તન્મય કુમાર રજનીશ ધાડસિંગ (27 વર્ષ, રહે. લકીસરાઈ, બિહાર), શૈલેશ મનોહર શેટ્ટી (27 વર્ષ, રહે. ભાઈંદર) અને રોશન મોહમ્મદ અન્સારી (28 વર્ષ, રહે. થાણે) તરીકે કરવામાં આવી હતી.આ ગેન્ગના સભ્યો ઈ-સીમકાર્ડનો ઉપયોગ કરીને ફિશિંગ કોલ્સ કરતા, ઝડપથી અનસિક્યોર્ડ લોન આપવાની ઑફર આપતા અને ‘પ્રોસેસિંગ ફી’ માંગતા, પરંતુ લોનની ચુકવણી ક્યારેય કરતા નહોતા. પીડિતો પાસેથી ડોલરમાં પૈસા અનટ્રેસેબલ ડિજિટલ માધ્યમો દ્વારા લેવામાં આવતા. મુલુંડ પોલીસને મળેલી સૂચનાના આધારે એક ફ્લેટ પર દરોડો પાડી પાંચ પુરૂષોને, જેમાં મુખ્ય સૂત્રધાર પણ સામેલ હતો, ઝડપી લીધા. જપ્ત કરેલી વસ્તુઓમાં લેપટોપ, મોબાઇલ ફોન, રાઉટર્સ અને 72,000 જેટલી રોકડ રકમનો સમાવેશ થાય છે. સંબંધિત કાયદાઓ હેઠળ કાનૂની કાર્યવાહી શરૂ કરવામાં આવી છે.
તાજેતરમાં મુલુંડમાં સાયબર છેતરપીંડી અને ફ્રોડના બનાવ વધી ગયા છે. સાયબર પોલીસ દ્વારા વારંવાર કહેવામાં આવી રહ્યું છે કે, અજાણ્યા નંબર પરથી મળતા કોલ્સ, ખાસ કરીને જે વ્યક્તિગત માહિતી અથવા લોન માટે પહેલેથી ફી માંગે છે, તે અંગે ખાસ સાવધાની રાખવી જરૂરી છે.
જો તમને લાગે કે તમે સાયબર ફ્રોડના શિકાર બન્યા છો, તો રાષ્ટ્રીય સાયબર હેલ્પલાઇન 1930 પર કોલ કરો અથવા સત્તાવાર સાયબર ક્રાઈમ રિપોર્ટિંગ પોર્ટલપર ફરિયાદ નોંધાવો.