સમાચાર

બુધ્વાર, ૨૬ નવેમ્બર, ૨૦૨૫

અપમાન જનક વ્યવહારનો ભાર લઈ લેતાં કેળકર કોલેજના 19 વર્ષીય વિદ્યાર્થીએ આત્મહત્યા કરી

કલ્યાણમાં રહેતા અને મુલુંડની કેલકર કોલેજમાં ભણતા 19 વર્ષીય વિદ્યાર્થી અર્ણવ ખૈરેને લોકલ ટ્રેનમાં હિન્દીમાં બોલવા બદલ માર ખાવો પડતાં અપમાનજનક પરિસ્થિતિમાં મૂકાયેલા અર્ણવે તે જ દિવસે સાંજે ગળાફાંસો ખાઈને આત્મહત્યા કરી હોવાની આઘાતજનક ઘટના ઘટી હતી.
કલ્યાણ ઈસ્ટમાં રહેતો અર્ણવ મુલુંડમાં કેલકર કોલેજમાં જવા માટે ટ્રેનમાં ચડ્યો હતો ત્યારે ભારે ગિરદી હોવાને કારણે તેણે આગળ ઊભેલા મુસાફરોને ‘થોડા આગે હો જાઓ... ધક્કા લગ રહા હૈ!’ એવું હિન્દીમાં કહ્યું તેથી એક મુસાફરે તેને મરાઠી બોલતા નથી આવડતું કે મરાઠી બોલતા શરમ આવે છે એવું કહીને વિવાદ ચાલુ કરી દીધો અને ત્યારબાદ વિવાદ ઉગ્ર બનતા પહેલાં મુસાફર સાથે અન્ય ચાર-પાંચ પ્રવાસીઓ પણ જોડાયા અને બધાએ સાથે મળીને અર્ણવની મારપીટ કરી હતી, જેને પગલે માનસિક તણાવ અનુભવી રહેલો અર્ણવ તે ટ્રેનમાંથી ઉતરીને અન્ય ટ્રેનમાં કોલેજમાં પહોંચ્યો હતો
પરંતુ કોલેજથી પણ તે ઘરે જલ્દી આવી ગયો હતો અને રસ્તામાંથી જ તેણે ફોન કરીને સમગ્ર ઘટના તેના પપ્પાને જણાવી હતી. સાંજે અર્ણવના પપ્પા ઘરે પહોંચ્યા ત્યારે અર્ણવનો રૂમ અંદરથી બંધ હતો. તેમણે પાડોશીઓની મદદથી દરવાજો ખોલતા ઘરના બેડરૂમમાં અર્ણવે પંખા પર ગળાફાંસો ખાધેલો જોઈને તેઓ શોક્ડ થઈ ગયા હતા. અર્ણવને હોસ્પિટલમાં લઈ જવાતા ડોક્ટરોએ તેને મૃત ઘોષિત કર્યો હતો. ત્યારબાદ અર્ણવના પપ્પાએ કલ્યાણ ઈસ્ટના કોલસેવાડી પોલીસ સ્ટેશનમાં અર્ણવને આત્મહત્યા કરવા તરફ દોરનારાઓ વિરૂદ્ધ ફરિયાદ નોંધાવી હતી.