સમાચાર

બુધ્વાર, ૧૬ એપ્રિલ, ૨૦૨૫

મુલુંડમાં ચોરી કરનાર એક મહિલા સહિત બે વ્યક્તિઓની ધરપકડ

મુલુંડ પોલીસે મુલુંડ પશ્ર્ચિમના એક ઘરમાંથી 28 લાખ રૂપિયાના સોનાના દાગીના અને રોકડ રકમની ચોરી કરવાના આરોપમાં 33 વર્ષીય ચોરીનો ઇતિહાસ ધરાવતી મહિલા સહિત બે વ્યક્તિઓની ધરપકડ કરી છે. પોલીસના જણાવ્યા અનુસાર, આ ચોરી તા. 3 અને 4 માર્ચના રોજ ઉદ્યોગપતિ તુષાર જૈનના ઘરે થઈ હતી. જૈને ફરિયાદ નોંધાવી હતી કે તેમના ઘરમાંથી 21.6 લાખ રૂપિયાના સોનાના દાગીના અને 6.5 લાખ રૂપિયા રોકડા ચોરાઈ ગયા છે. 7 માર્ચના રોજ કેસ નોંધવામાં આવ્યો હતો, જેના પગલે પીએસઆઈ ગણેશ મોહિતે અને તેમની ટીમની દેખરેખ હેઠળ તપાસ શરૂ કરવામાં આવી હતી.
પ્રાથમિક તપાસ દરમિયાન, પોલીસે પરિવારના સભ્યો અને ઘરના નોકરોની પૂછપરછ કરી, સાથે જ વિસ્તારના સીસીટીવી ફૂટેજનું પણ વિશ્ર્લેષણ કર્યું. 100થી વધુ સીસીટીવી ક્લિપ્સની તપાસ કરવામાં આવી, જેનાથી એક મહત્વપૂર્ણ સફળતા મળી. ગુનાના સ્થળની આસપાસ અને ભાંડુપ અને કુર્લા વિસ્તારોમાં ઓટોરિક્ષામાં મુસાફરી કરતી વખતે બે મહિલાઓ શંકાસ્પદ વર્તન કરતી જોવા મળી.
એક શંકાસ્પદ વ્યક્તિની ઓળખ સારિકા શંકર સકત તરીકે થઈ છે, જે કુર્લાની રહેવાસી છે અને તેની સામે ઘાટકોપર, મુલુંડ, કાંદિવલી, જુહુ, થાણે અને ડોમ્બિવલી સહિત અનેક પોલીસ સ્ટેશનોમાં વારંવાર ગુના નોંધાયેલા છે. પોલીસે આરોપ લગાવ્યો છે કે તેણે બનાવેલી ડુપ્લિકેટ ચાવીનો ઉપયોગ કરીને ઘરમાં પ્રવેશ મેળવ્યો હતો. તેની કુર્લા સ્થિત તેના નિવાસસ્થાનેથી ધરપકડ કરવામાં આવી હતી.
પૂછપરછ દરમિયાન, સકતે ચોરેલું સોનું તેના સાથી, ધનંજય રામજી વર્મા (48) ને વેચવાની કબૂલાત કરી, જે કુર્લાનો રહેવાસી છે. ત્યારબાદ વર્માની ધરપકડ કરવામાં આવી, અને પોલીસે 340 ગ્રામ સોનાના બાર સહિત ચોરાયેલી વસ્તુઓ જપ્ત કરી.
આ સફળતા અધિક પોલીસ કમિશનર (પૂર્વીય ક્ષેત્ર) મહેશ પાટિલ, ડેપ્યુટી પોલીસ કમિશનર (ઝોન 7) વિજયકાંત સાગર, આસિસ્ટન્ટ પોલીસ કમિશનર (મુલુંડ ડિવિઝન) સંદીપ મોરે, સિનિયર ઇન્સ્પેક્ટર અજય જોશી અને ક્રાઇમ ઇન્સ્પેક્ટર નીતિન ખડગેના માર્ગદર્શન હેઠળ મળી. તપાસ ટીમમાં પીએસઆઈ ગણેશ મોહિતે અને અધિકારીઓ કિરણ ચવ્હાણ, શેખર બાવિસ્કર, સુનિલ વિંચુ, મોહન નિકમ, મનોજ મોરે અને વિવેક શિમ્પીનો સમાવેશ થતો હતો.