સમાચાર

બુધ્વાર, ૧૯ નવેમ્બર, ૨૦૨૫

હવેથી ટૂ-વ્હીલર પર બન્ને જણ માટે હેલ્મેટ અને કારમાં બધા માટે સીટ-બેલ્ટ ફરજિયાત

6 મહિનામાં નિયમનું પાલન કરાવવા સુપ્રીમ કોર્ટે રાજ્ય સરકારોને આપ્યું અલ્ટિમેટમ

રાજ્યમાં દરેકે દરેક  ટૂ-વ્હીલર ચલાવનાર અને તેની પાછળ બેસનાર માટે હેલ્મેટ પહેરવાનું અને ફોર-વ્હીલરમાં બેઠેલા બધા જ પ્રવાસીઓએ સીટ-બેલ્ટ પહેરવાનું ફરજિયાત થશે. આ નિયમનો કડકપણે અમલ કરાવવા માટે સુપ્રીમ કોર્ટની દેખરેખ હેઠળ રચાયેલી ઉચ્ચ સ્તરની કમિટીએ રાજ્યના ચીફ સેક્રેટરીને 6 મહિનાનો સમય આપ્યો છે.
આ અંગેે ગત સોમવારે મહારાષ્ટ્રના ચીફ સેક્રેટરી સાથે થયેલી બેઠકમાં રોડ સેફટી માટે બનાવાયેલી સમિતિએ રાજ્ય સરકારને ટૂ-વ્હીલર માટે હેલ્મેટ અને ફોર-વ્હીલરમાં બેઠેલા બધા મુસાફરો માટે સીટ-બેલ્ટ પહેરવાના આદેશનો કડક અમલ કરવાનો નિર્દેશ આપ્યો હતો. રોડ અકસ્માતના ડેટા મુજબ70 ટકા અકસ્માતમાં ટૂ-વ્હીલર ચલાવનારનો અને રાહદારીઓનો સમાવેશ થાય છે. આ આંકડો ઘટાડવા અને સુપ્રીમ કોર્ટે ગયા મહિને આપેલા આદેશનું પાલન થાય એ હેતુથી સમિતિએ નવા નિયમના કડક પાલન પર ભાર મૂક્યો હતો.
આ બેઠક બાદ મહારાષ્ટ્ર સરકારે એક પરિપત્ર બહાર પાડીને રાજ્યનાં તમામ મ્યુનિસિપલ કોર્પોરેશનોને તેમના વાર્ષિક બજેટનો એક ટકા ભાગ રાહદારીઓની સુરક્ષા માટે ફાળવવાનો આદેશ આપ્યો હતો. રાજ્ય સરકારનું લક્ષ્ય રોડ-અકસ્માતોની સંખ્યા 35 ટકા સુધી ઘટાડવાનું છે. મુંબઈ-નાગપુર સમૃદ્ધિ હાઇવે પર ચાલુ વર્ષે જાન્યુઆરીથીસપ્ટેમ્બર મહિનામાં ગયા વર્ષ કરતાં અકસ્માતોમાં 38 ટકા વધારો થયો છે, જ્યારે અકસ્માતમાં થયેલાં મૃત્યુના આંકડામાં 16 ટકા વધારો થયો છે. મુંબઈ-પુણે એક્સપ્રેસવે પર સમાન સમયગાળામાં આ વર્ષે અકસ્માતમાં ઘટાડો થયો છે. 46 અકસ્માતમાં 51 લોકોનાં મૃત્યુ નોંધાયાં છે, જ્યારે ગયા વર્ષે 57 અકસ્માતમાં 72 મૃત્યુ થયાં હતાં.